Igo na ba ang pagtoo sa Dios ug pagbinuotan para maluwas?

PANGUTANA:
Way relihiyon nga makaluwas. Igo na nga motuo ka ni Cristo ug magpakatawo pag-usab, born-again, kon magbuotan, maluwas ka. Wala kinahanglan nga magpasakop ka pa sa Iglesya Katolika. Di'ba?

TUBAG:
Sumala sa diksyonaryo ang relihiyon mao ang pag-ila ug pagtuman sa labing Makagagahom nga gitawag natog Diyos (Webster's Dict.) Ug sa libro ni Sirac 35:18 giingon sa Dios: "Manimalos ako pinaagi sa pagdugmok sa walay tinuhoan. "timan-an nga si Jesucristo nagtudlo usab og tinuhoan. "Gidala ni Aquila ug ni Priscilla si Apolo sa ilang balay ug gisaysayan sa hustong kahulogan sa tinuhoan ni Cristo," (Buhat 18:26). "Kon dunay magtudlo nga dili muoyon sa matuod nga pagtulon-an sa atong Ginoo ug sa atong tinuhoan nagpasigarbo siya.... "(1 Tim. 6:3). Busa luwason sa Ginoo ang dunay relihiyon kon kanang tinuhoana tinukod ug gitudlo ni Cristo, dili tinukod lang sa tawo.

Dili igo nga ang usa ka tawo moingon nga siya "nagbinuotan," kondili tumanon gayod usab niya ang kabubot-on sa Ginoo. Kay dunay paagi nato nga dili mao ang paagi sa Dios," Ang ilang pag-alagad wala magsukad sa matuod nga kahibalo kay wala sila masayod sa paagi sa Dios sa pagmatarong sa tawo. Gigamit nila ang ilang kaugalingong paagi busa wala sila musunod sa paagi sa Dios sa pagmatarong sa tawo,"(Roma 10:2-3). Ug usa ka paagi sa Dios mao nga mahisakop kita sa matuod nga Iglesya aron Iyang pagaluwason, "Kay gitawag kamo sa Dios aron mahiusa sa usa ka lawas."(Col. 3:15), "Si Cristo ang ulo sa lawas nga mao ang Iglesya," (Col 1:18). Ug si Cristo mismo ang magaluwas sa Iyang lawas nga mao ang Iglesya," (Efeso. 5:23). Ang Iglesya Katolika mao ang kaponongan nga tinukod ni Cristo (Grolier Encycl. Vol. 5 p.106).

Tinubdan: Soc Fernandez (www.katoliko-bisaya.blogspot.com)