Si Kristo mao ra ba usab ang Dios Amahan nga nagpakatawo dinhi sa kalibotan?

PANGUTANA:

Giingon sa Jesus Miracle Crusade nga gipangulohan ni Pastor Almeda, nga si Cristo mao ra ang Dios nga Amahan nga mao usab ang nagpakatawo. Si Isaias miingon: “Kay alang kanato ang usa ka bata natawo; alang kanato ang usa ka anak nga lalaki gihatag, ug ang kagamhanan igatungtung sa iyang abaga, ug pagatawgon ang iyang ngalan nga kahibulongan, magtatambag, Dios nga makagagahom, Amahan nga walay katapusan, Prinsepe sa Pakigdait” (Isa. 9:6). Dili ba klaro nga si Cristo mao kini ang Amahan nga walay katapusan ug siya ang nahimong batang lalaki, busa mao ra siya si Cristo? Si Cristo miingon usab ni Felipe, “Ang nakakita kanako, nakakita sa Amahan” (Juan 14:9) ug “Kay ako ug ang Amahan usa ra” (Juan 10:30). Ambi tubaga kini. 

TUBAG: 

Dili mahitabo nga usa ra sa pagka-persona ang Amahan ug si Cristo. Sa paglalang sa Dios sa kalibotan giingon: “Ang Dios namulong: Buhaton nato ang tawo sama sa atong dagway” (Gen 1:26). Usa ra ka Dios ang namulong, apan nganong miingon man Siya “Buhaton nato?” Ang “nato” labaw sa usa. Kinsa man ang kauban sa Amahan sa paglalang sa kalibotan? Dili ang mga anghel, kay ang mga anghel binuhat man. Dili man sila magbubuhat. Ang kauban sa Amahan mao ang Cristo ang kaalam (1 Cor. 1:24) kinsa miingon: “Ako ang kaalam nga naghimo sa kabuotan nga mao ang akong puloy-anan. Si Yahweh nagbaton kanako sa sinugdan sa iyang dalan. Unya ako didto tupad kaniya ingon nga usa ka batid nga magbubuhat” (Prob. 8:12, 22, 30). Ug ang Espiritu Santo usab magbubuhat, ania: “Ang Espiritu sa Dios nagbuhat kanako. Ug ang gininhawa sa makagagahom naghatag kanako og kinabuhi” (Job 33:4). Klaro nga ang Espiritu Santo kauban sa Amahan sa pagpanglalang sa uniberso.

Ang pagka-gitawag sa batang lalaki og “Amahan nga walay katapusan,” dili sabton nga siya mao ang Dios Amahan. “Dili ba siya mao ang imong amahan ang nagpalit kanimo. Siya nagbuhat kanimo” (Deut 32:6). Ang magbubuhat matawag diay og Amahan, kay si Cristo magbubuhat man, pues matawag usab siya og Amahan. Apan dili siya mao ang Amahan sa pagka-persona. Asa kini nato mabasa? “Kining mga pulonga wala isulti sa Amahan ngadto sa Iyang mga anghel kondili ngadto lang sa Iyang Anak. Ug ang Dios miingon sa Iyang Anak: Ang imong trono, oh Dios, alang sa katuigan nga walay katapusan” (Heb 1:5,8).

Ang usa ka anak nga liwat kaayo sa iyang amahan makaingon, “Ang nakakita kanako, nakakita sa akong amahan.” Buot ipasabot ni Cristo nga ang kabalaan ug katarung sa Amahan anaa kaniya: “Isul-ob ninyo ang bag-ong tawo, nga sa pagkasama sa Dios diha sa pagkamatarong ug sa kabalaan sa kamatuoran” (Efeso 4:24).

Ang Isaias 9:6 dili gayud magamit nga ang Dios Amahan mao ang nagpakatawo tungod sa mga pulong: kay usa ka anak nga lalaki gihatag.” Kon dunay gihatag, dunay naghatag. Ug lahi ang naghatag kay sa gihatag. Kinsa man ang naghatag? “Sila managtuwaw kang Jehovah… ug siya magapadala kanila og manluluwas ug usa ka manlalaban” (Isa 19:20). Ug ang gipadala nga manlalaban mao si Cristo (1 Tim 2:5). Ug ania ang giingon ni San Juan: “Kay gihigugma sa Dios ang kalibotan mao nga gihatag Niya ang Iyang bugtong Anak nga mao si Cristo kinsa kadtong motuo kaniya dili malaglag kondili may kinabuhi nga walay katapusan” (Jn 3:16). Ug matud pa ni San Gabriel kang Maria: “Ang gahom sa Hataas Uyamot magalandong kanimo tungod usab niini, ang balaan nga matawo paganganlan nga Anak sa Dios” (Luk. 1:35). Klaro nga dili ang Dios nga Amahan maoy natawo, kondili ang Anak sa Dios nga mao si Cristo. Ang giingon ni Isaias nga ang bata pagatawgon og Amahan nga walay katapusan, wala magpasabot nga si Jesus mao ang Dios Amahan. Duna ba kitay mabasa nga si Jesus miangkon nga siya dili Dios nga Amahan? Miingon si Jesus, “Ako dili usa ra, ang Amahan kauban nako” (Jn 16:32). Busa sayop ang pag-ingon nga si Jesus ug ang Amahan usa ra sa pagka-persona. Si San Juan miingon: “Tulo ang nagpamatuod sa langit, ang Amahan, ang Pulong ug ang Espiritu, kining tulo usa” (1 Juan 5:7). Matin-aw nga tulo gayod nga persona, apan unsa ang ilang pagkausa ra? “Kay ang Dios usa ra” (Sant. 2:19). Busa ang pagka-Dios nila maoy usa ra.

Ang pagmatuod nga si Cristo miangkon nga dili siya mao ang Amahan: “Maingon nga ang Amahan nagsugo kanako, sa maong pagkaagi ako nagsugo kaninyo” (Juan 20:21). Matin-aw ang parallelism ni Cristo, Siya nga nagsugo lahi sa iyang mga tinun-an nga iyang gisugo. Ang Amahan usab nga nagsugo, lahi kaniya nga sinugo. Lain pa gayod nga pamatuod nga si Cristo dili mao ang Amahan, siya miingon: “Ako moadto sa akong Amahan” (Juan 14:28).

Sa diha nga gibato si San Esteban naabli ang langit duha ka persona and iyang nakita: “Ug nakita ko ang langit naablihan ug ang Anak nagtindog sa tuong kamot sa Dios” (Buhat 7:56). Si San Juan miingon: “Kini mao ang anti-Cristo kadtong naglimod sa Amahan ug sa Anak” (1 Juan 3:22). Ang conjunction ug kun pagdugtong, nagpasabot nga duha gayod ka persona, and Amahan ug ang Anak kadtong maglimod niini, anti-Cristo. Diha sa Krus miingon si Jesus, “Amahan ko, pasayloa sila kay wala sila masayod sa ilang gibuhat” (Lukas 23:34). Kon siya pa ang Amahan, moingon unta siya, “Ako, ang Amahan pasayloon ko sila kay wala sila masayod sa ilang gibuhat.” Ug dayon moingon unta siya, “Ako ang Amahan nganhi kanako itugyan ko ang akong espiritu.” Klaro nga dakong sayop ang panudlo sa JMC bahin sa oneness, nga ang Amahan ug ang Anak usa ra ka persona, managlahi gayod sila. Apanusa ra sila sa pagka-Dios.

Tinubdan: Soc Fernandez (www.catholicfaithdefenders.com)