Nganong sa misa ang ipakalawat raman ostiyas, nganong wala may bino?

PANGUTANA:

Nganong sa misa ang ipakalawat sa manimba ang pan raman wala may bino? Salamat sa paghatag unya ug katin-awan ani brod. God bless! (nangutana: Alvin Ventura)

TUBAG:

Sa katapusang panihapon, gihulagway dinhi nga ang midawat sa pagkalawat sa duha ka bayhon mao ra ang mga apostoles ug pulos sila mga ministro sa Ginoo (pari). Busa ang mga laity kon dili pari wala mahiapil niadtong sugoa nga obligado nga mokalawat sa duha ka bayhon sa pan ug bino. Dunay pagpakalawat sa mga apostoles sa mga matuohon mao na lamang ang lawas ni Cristo sa bayhon nga pan. Buhat 2:46 – “Ug sa nagpadayon sila sa paghiusa sa templo sa matag adlaw ug sa pagtipik-tipik sa tinapay…” Apan mahimo sab nga ang mga dili pari makahimo pagkalawat sa duha ka bayhon sa pan ug bino. Ato ning masinati sa mga espesyal nga okasyon nga ipahigayon sa Simbahan.

Sumala sa pagtoong Katoliko, ang Ginoong Jesucristo tibuok gyod nga anaa sa matag bayhon, pan man o bino ug sa kada bayhon anaa ang buhing Cristo. Ang usa ka patak nga bino o usa ka mumho (crumbs) sa konsagradong ostiya igo na nga makahatag sa kinabuhing dayon. Ang atong Ginoo miingon, “… Ang mokaon niining maong pan mabuhi sa dayon.” (Juan 6:58). So kung pan lamang ang atong kalawaton walay nakulang tungod kay anaa na diha ang tibuok nga buhing Cristo.

Tinubdan: Jessie Fuertes