Header Ads

Nganong aduna may bayad ang pamisa sa kalag, pabunyag, pakasal ug uban pa?

PANGUTANA:
Nahibalo ako nga dapat pari ang angayan kong pangutan-on nianing akong pangutana. Apan nanghinaut lamang ako nga matubag kini nga pangutana sa mga nagpasiugda niini nga website.

Ang akong pangutana mao kini: Ngano mang sa halos matag lihok sa Simbahang Katoliko aduna may bayad? Ang bayad ra ba gayud dili barato kundi mahal. Magpalubong naay bayad, magpakasal naay bayad, magpablessing naay bayad, magpabunyag naay bayad (kada maninoy maninay kahi ang bayad), magpamisa naay bayad, halos tanan adunay bayad nga dinagku. Pati pagpamisa sa kalag adunay presyo ang matag kalag nga ipamisa (sigon sa ubang parokya). Aha man gibase sa simbahan ang presyo sa mga balayronon?

Wala koy pangutana sa mga boluntaryo nga mga paghatag, sama sa mga halad ug sa mga pledges. Ang pangutana nako kung aha gibase ang mga presyo nga ipabayad as requirements sa mga nahisgutang aktibidades. Ug nganung ingon ani man ang sistema? (Nangutana: concernedCatholic <booter12041@yahoo.com>, date sent: Tue, Dec 13, 2011 at 11:48 PM)

TUBAG:
Kalinaw’g gugma gikan sa atong Ginoong Jesukristo. Sa akong pagsabot brod sa imong mga pangutana, nangita ka ug mga basihanan ngano nga sa mga simbahanong lihok duna may bayad ug nganong presyohan man? Mora mag nanapi niini ang Simbahang Katoliko kon pamation. Taas-taas man ning imong pangutana brod mao na nga nagkinahanglan pod ug taas nga explanation. Hinaut pa unta nga sa panabang sa atong Ginoo makahatag ko nimog katin-awan sa tubag sa imong naglagobo nga pangutana. Ang mga teksto sa Bibliya gikuha gikan sa “Maayong Balita” bible version.
  • Una sa tanan, ang Dios wala magkinahanglan niining mga bahandia tungod kay siya man ang tag-iya niining tanan, apan ang tawo nga iyang mga alagad sa Simbahan nagkinahanglan niini aron makapadayon sila pag-alagad sanglit nagsalig man lang sila sa mga halad sa mga sakop sa Simbahan sama sa pagkaon, sinina (bisting parianon), sakyanan, hinabang para sa misyon sa simbahan, pagtukod sa simbahan, mga seminary, mission house ug uban pa. Niining mosunod nga mga punto sa Bibliya gipahayag nga ang mga ministro ni Kristo adunay katungod sa pagdawat ug suhol sa ilang hinagoan ingon nga alagad sa Dios.
  • 2 Hari 12:13, 16 - Apan kining kwartaha (halad) dili mahimong gastohon alang sa mga planggana nga plata....kay isuhol man kini sa tanan nga nagtrabaho pag-ayo sa Templo ug ibayad sa mga materyales....... Wala dad-a sa Templo ang salapi nga gihalad alang sa sala kay kining salapia alang man sa mga pari.
  • Tinuod nga ang mga sacramento dili matumbasan ug salapi. Sa Mateo 10:8 ang Ginoo nag-ingon, "Ingon nga inyo kining nadawat nga wala'y bayad ihatag usab nga wala'y bayad,"
  • Busa tungod niini makapangutana kita: ngano man nga pabayran man ang bunyag, kasal, konpirma ug uban pa nga ihatag man kaha nga walay bayad? Dili ba usa ka negosyo ug panapi kining buhata?
  • Ang mga sacramento wala ibaligya ug dili usab mapalit. Usa kini ka dakong sala nga gitawag og “Simony”, nga mao ang pagbaligya sa mga sagrado butang. Gikan kini ni Simon Magus. Sa Buhat 8:19-24,  gitanyagan ni Simon Magus ang mga Apostoles ug salapi sa hunahuna nga mapalit niya ang maong Sakramento (Kumpirma).
  • Diha sa atong paghatag og salapi sa Simbahan, dili ang mga Sacramento ang atong gibayran kondili ang kahago sa ministro sa Dios.
  • Sa 2 Cor.11:7-8, si San Pablo miingon, "Wala ako magpasuhol kaninyo sa akong pagwali sa Maayong Balita sa Dios…. Samtang nag-alagad ako kaninyo, gisuholan ako sa ubang iglesia.
  • Atong timan-an nga si San Pablo usa ka pari. Sumala sa Roma 15:16 niingon siya – Nag-alagad ako ingon nga pari aron pagwali sa Maayong Balita nga gikan sa Dios.....
  • Roma 4:4 – Suholan ang tawo nga nagtrabaho, apan ang suhol dili maisip nga gasa kay iya mang gihagoan. (sa ato pa bayad o suhol sa iyang kahago)
  • 1 Corinto 9:4 – Wala ba god akoy katungod sa pagdawat sa ihatag nga pagkaon ug ilimnon tungod sa akong trabaho?
  • 1 Corinto 9:11 - Kon nagpugas kami sa espirituhanong mga binhi diha kaninyo, ikasakit ba ninyo kon moani kamig yutan-ong kaayohan (butang materyal) gikan kaninyo?
  • 1 Corinto 9:13-14 – Sa walay duhaduha, nasayod kamo nga ang nag-alagad sa Templo nagkuha sa ilang pagkaon gikan sa Templo, ug kadtong nag-alagad didto sa halaran, may bahin sa halad. Sa mao usab nga pagkaagi, ang Ginoo nagbuot nga kadtong nag-wali sa ebanghelyo, mabuhi pinaagi sa ebanghelyo.
  • 1 Tomoteo 4:17-18 – Ang mga pangulo sa iglesia nga maayong motuman sa ilang katungdanan angayng ilhon nga takos sa doble nga suhol, labi na kadtong naghago gayod sa pagwali ug pagtudlo….. Nag-ingon usab ang Kasulatan,”Ang mamumoo angay gayod suholan.
  • 2 Hari 12:13, 16 - Apan kining kwartaha dili mahimong gastohon alang sa mga planggana nga plata....kay isuhol man kini sa tanan nga nagtrabaho pag-ayo sa Templo ug ibayad sa mga materyales....... Wala dad-a sa Templo ang salapi nga gihalad alang sa sala kay kining salapia alang man sa mga pari.
  • Tungod niini katungdanan sa usa ka Kristianos ang pagsuporta sa Simbahan kay baslan sa Ginoo kadtong naghatag nga malipayon sa walay pagbagulbol.
  • 2 Corinto 9:7-9 – Busa gihunahuna ko nga paunahon ko pagpa-anha kaninyo king mga kaigsoonan nato aron andamon nilang daan ang gasa nga inyong gisaad. Unya inig-abot ko diha, andam na ang tanan ug magpaila kini sa inyong gugma sa paghatag ug dili tungod kay gipugos kamo. (8) Timan-I nga ang nagpugas ug diyotay, mag-anig diyotay; apan ang nagpugas ug daghan mag-anig daghan. Busa kinahanglan mohatag ang tagsatagsa sumala sa iyang gusto, ug dili magbagutbot ni maghunahuna nga gipugos siya, kay ang Dios nahigugma sa naghatag nga malipayon. (9) Ug makahatag ang Dios kaninyo labaw pa kay sa inyong gikinahanglan nga tungod niini makabaton kamo sa tanan ninyong kinahanglanon, ug sobra pa gani alang sa tanang maayong buhat.
  • Ang mga unang Kristohanon panahon sa mga Apostoles gibaligya gani nila ang ilang mga kabutangan ug ang halin gitugyan sa Simbahan ug wala gyod tay mabasa nga gisayangan sila sa bahandi nga ilang gihatag ni sila gimahalan.
  • Buhat 4:34-35 – Walay usa kanila nga nakulangan. Kadtong may mga uma o mga balay nagbaligya niini, ug ang halin gitugyan nila sa mga apostoles; gibahinbahin kini sa mga apostoles sa tagsatagsa kanila sumala sa ilang gikinahanglan.
  • Busa brod kung gimahalan ta sa gipresyo sa Simbahan, wala man pod ta pugsa. Kung mahalan ta sa presyo sa kasal, pwede man pod ta magpakasal ug Mass Wedding nga dunay mo-sponsor kay wala may bayad. Sa akong kasinatian diha may gibunyagan dinhi sa among parokya nga wala pabayri sa Pari tungod kay pwerte gyong pobreha ug ako saksi niini.
  • Kon ang tawo nga maoy nanaad dili makaabot sa bili, kinahanglan dad-on niya ang tawo nga hingtungdan ngadto sa pari ug ang pari maoy mohatag ug bili sumala sa maabot sa tawo nga naghimo sa panaad.
  • Bahin sa pamisa sa mga kalag sa purgatoryo kung dunay gihatag nga presyo wala magpasabot nga gibayran ang ilang kaluwasan kundili usa kahago sa nag-alagad  sa ministro sa Dios. Ang pagpresyo mag-agad na sa mga lagda sa mga parokya.
  • Sumala sa balaang kasulatan sa 2 Macabeo 12:43-46 – (Nag-ulohan: Mga Pag-ampo Alang Sa Mga Tawo Nga Nangamatay Sa Gubat) “Nagpaamot usab siya (Judas Macabeo) gikan sa tanan niyang mga tawo ug nikabat kinig 2,000 kasalapi nga plata ug gipadala kini ngadto sa Jerusalem aron gamiton alang sa usa ka halad alang sa sala. Si Judas naghimo niining hamili nga butang tungod kay nagtoo siya sa pagkabanhaw. Kun wala pa siya nagtoo nga ang patay mabanhaw usa ka unta ka butang nga binuang ug walay kapuslanan ang pag-ampo alang sa mga nangamatay. Tungod niining malig-on ug diosnon nga hunahuna nga ang tanang mga tawo nga nagtoo sa Dios makadawat ug usa ka ganti nga kahibulongan, si Judas nag-andam alang sa usa ka halad aron malinkawas ang nangamatay sa ilang mga sala.”

Autoridad sa Pagpresyo

  • Levitico 7:7 - Adunay usa ka lagda bahin sa halad alang sa sala ug sa bayad nga halad....
  • Levitico 5:17-19 – Kon may magbuhat sa bisan unsa nga gidili sa Ginoo, nakasala siya, busa angay siyang silotan bisan pa kon wala siya masayod niini. Kinahanglan magdala siya ngadto sa pari ug laking karnero nga walay daot ingon nga bayad nga halad. Presyohan ninyo kini sa bili sa halad alang sa sala......Kini bayad nga halad alang sa sala kay nakasala man siya sa Ginoo.
  • Levitico 27:14 - Kon may maghalad sa iyang balay ngadto sa Ginoo aron mahimo kining sagrado, presyohan kini sa pari.....
  • Exodo 30:11-13 – Ang Ginoo miingon kang Moises, “Inigsenso ninyo sa sa katawhan sa Israel kinahanglan ang tagsatagsa magbayad kanako ug lukat sa iyang kinabuhi aron walay katalagman nga mahitabo kaninyo samtang magpadayon ang senso. Ang tanan nga mahiapil sa senso kinahanglan nga mobayad sa kantidad nga pangayoon. Timbangon kini sa timbangan nga gigamit didto sa Tolda. Kinahanglan mobayad niini ang tanan silbing halad kanako.”
Ang simbahan wala magpugos nga mohatag sa ikapulo (tithes) kondili sumala sa gugma sa pagka manggihatagon (love percent). Timan-an nato ang giingon ni San Pablo sa 2 Corinto 9:8 nga nag-ingon, “kinahanglan mohatag ang tagsatagsa sumala sa iyang gusto, ug dili magbagutbot ni maghunahuna nga gipugos siya, kay ang Dios nahigugma sa naghatag nga malipayon.

Si Cristo miingon:
Lucas 20:25 - ...ibayad sa Emperador ang iya sa Emperador, ug ibayad sa Dios ang iya sa Dios.

Salamat sa imong pagbasa brod ug God bless!

Tinubdan: Jessie Fuertes (CFD Nasipit Chapter)

11 comments:

  1. brad, daghan salamat sa pagpa ambit niani. daghan ko nakat-onan.

    ReplyDelete
    Replies
    1. Your welcome brod Paul!

      Pro Deo Et Ecclessia! God bless!

      Delete
  2. PARA KANAKO DILI MAN DAOTAN NGA ADUNA PRESYO ANG MGA SERVICIO SA ATONG SIMBAHAN,,,,PERO LANG DILI USAB UNTA NILA TAAS TAASAN NGA MORA DILI NA KITA MAKAGUIHAWA,,,IKADUHA ILA USAB UNTA NGA TAN-AWON ANG KAPASIDAD SA TAWO LABINA SA MGA PATAY NGA GUIMISAHAN,,,

    ReplyDelete
  3. my most concerned is during the time when many of our kaparokyano mostly coming from the far away barrio, labina kung guikan pa sa Tagbabakon, will bring their dead in the church for a blessing from the priest,,,and then priest will refuse as the owner of the dead person cannot meet the required payment NAPAKASAKIT NAMAN,,,maayo unta ug ila ubus-ubusan ang balayronon labina kung guikan pa sa layo nga lugar,,,,kay para sa ako, kana nga simbahan maoy nagbunyag, nag comperma, diha ako nag una ug kalawat, diha ako guikasal,,,manghinaut lang ako nga kung mahitabo nga dili ako ablihan sa pari kay wala makabayad ang akong mga nisunod sa akong lubong,,,bisan sa pultahan na lang,,,mag ampo na lang sila ug usa ka PATER NOSTER, TULO KA MAGHIMAYA KA MARIA, UG USA KA MAGHIMAYA KA HARI,,KAY DILI MAN MOABLI ANG PULTAHAN KAY DILI LAGI MAKABAYAD SA REQUIRED FEE,,,NAPAKASAKIT NAMAN,,,

    ReplyDelete
  4. Sakto ka brod.Tinood nga angay suholan ang nag serbisyo sa simbahan pero kong mahal rasad kaayo ug dili misahan or bindisyonan ang patayg nga lawas kay walay ikabayad murag lahi nasad na nga istorya.Sa bagay ang pari tawo rasad ug dili man sad ikalimod nga naay pari nga abusado ug bisyoso.Ang Simbahan usa ka instituition nga adunay mga lider nga dili kalikayan nga mga abusado.Ato nalang na silang i ampo brod.

    ReplyDelete
  5. Sos ko Kung namatayan ta magbayad kpa para malubong ang Patay nimo 9k hoi mga pari grabi naman mo namatayan na gani may bayad pa..Hasta nasal ug kompirma may baya unya may Pledges pa kada USA ka tawo bweset nagmahay ko ngano nakatoliko ko maypa mo balhin ug geligion

    ReplyDelete
  6. Kita man gud kung about sa simbahan na mag bagulbol daun,kagamay Ra ana kung gusto,pirog kasakit man Gani ug gadjet maka lod pag halos taga adlaw,dapat jud mobayad ta kay unsa pod gamiton nilang mga pari,wala biya na sikat sweldo

    ReplyDelete
  7. Ok ranang naay bayad basta makaya ra.. Pero ngano man nga adunay mga pari nga di mosogot momisa kung way ikabayad?
    Ila mang balibaran tungod kay way ikahatag...
    Unsa may tawag nato ana?
    Serbesyo o pagpangwarta?

    ReplyDelete
  8. KINING MGA NAG REKLAMO NGA DAKO OG BAYAD ANG PAGPAMISA SA PATAY,KASAL,BUNYAG OG UBAN PA.KUNG MAMALIT OG MGA MATERYAL NGA BUTANG SA ILANG PANIMALAY WALAY REKLAMO.ILABINA SA PAG HANDA SA ILANG PANIMALAY SAMA SA BIRTHDAY BONGGA KAAYO,GRABE MAKAGASTO SA INOM,SUGAL OG UBAN PA.KUNG MAG HISGOT NA GANIG BAYAD SA SIMBAHAN DAGHAN OG REKLAMO.MAAYO GANI TANG MGA KATOLIKO KAY DILI TA PUGSON PAGHATAG OG 10 PORSIYENTO DILI PAREHA SA UBAN SEKTA NGA OBLIGADO GYOD NGA MO HATAG OG 10 PORSIYENTO.

    ReplyDelete
  9. Dri sa among parokya libre ang kasal, kon mosunod sila sa schedule ug mga tamdanan. Kanang bayad usa kana ka penalty kon ang kaslonon maoy magboot sa ilang pagahimoon nga kasal.

    ReplyDelete

Powered by Blogger.